Relacjo na żywo ze pszimusowego szkolynio

Po  zaliczyniu  wszystkich etapow tyj niylatwyj trasy colko nasza grupa sie spotkala zas na parkingu i fest juz godne  pojechalimy na lobiod .Co dziyn to jymy go niyskorzij, az boja sie myslec co by bylo jakbych sam bola ze dwa tydnie ! Chyba sniodanie musialoby nom styknonc na calutki  dziyn! We wieczor to frelki niy wiedzialy kaj szlapki dac - czy na zyrandol  czy lepij je wsadzic do jakigo pojymnika ze lodowatom wodom , bo wylajziyly nom bokami zaliczone  schody w  skalnym miescie.  

Po ciynszkich dniach wreszcie psziszol czas na relaks. Chociosz tego zodyn z nos jeszcze niy wiedziol jak wlajziyli my do podstawionego autobusa. Pojechalimy do Kłodzka - miasteczka łoddalonego ło 35 km . Na parkingu kozdy osglondol sie ciekawie kaj my som . Na murze calkym niypozornyj chalpy poczytali my napis - Minieuroland. Co to moze  byc i po co nos wywiyzli w te szczere pole? Dom łotoczony wysokim kamiynistym murym nie zrobiol na zodnym z nos wiynkszego wrazynio. No ale dobra - skoro trza isc - no to my poszli. Dzwiyrze otwarly sie pszed nami same, i zajs kozdy z nos musiol wydac pora groszy na bilet wstympu , wylezli my na drugo strona tego budynku do ogrodu ... Jak sie okozalo po dokladniejszym ozejrzyniu - tyn ogrod mo 20 000 m2 czyli colke dwa hektary . Piyrsze spojrzynie w lewo i .... SZOK  ! Znodli my sie bez zapowiedzi po drugij stronie lustra , jak Alicja w krainie czarow - w bajkowym ogrodzie misternie wykonanych dosyc pokaznych rozmiarow miniatur . Miniatury przedstawialy najciekawsze budowle i zabytki znane ze wszytkich krajow Europy . Teraz jesiyniom brakowalo sam tych wszystkich kolorowych kwitnoncych i pachnoncych kwiotkow , kere ozdabiaja miniatury od wczesnyj wiosny az do poznego lata , mimo braku tych kolorowych akcyntow kozdy z nos łaziol wele tych cudow ze kozdyj strony po dwa razy ze osdziawionymi  japami  i gosno pioł ze zachwytu. Kozdy tysz podziwiol ta dokladno i bardzo precyzyjno robota jako sam ostala nom przedstawiono . Na tyn przikład powiym wom - ze zamek we Ksiązu tworzolo szesciu modelarzy bez pol roku , co je blank latwo  przerachowac, ze jakby tako maketa robiol ino jedyn z nich to zajyno by mu to colke trzi lata ! Wymiyniono miniatura kosztowala Minieuroland 200 tysiyncy złotych . Idzie tam oboczyc krziwo wieza z Pizy , wieza Eifla , londynski Big Ben , statua wolnosci , mosty i wiadukty , dom Violetty Villas kero pochodzi z tych stron  i duzo , duzo inkszych bardzo ciekawych znanych i podziwianych europejskich architektur . Je tam tysz kawiarynka kaj sie mozna  zicnonc na chwilka i srogi plac zabaw. Jo osobiscie sie obiecalach , ze przijada sam jeszcze roz wiosnom albo latym , kedy bydzie juz wszystko ozdobione przecudnymi dekoracyjnymi kwiotkami kere extra wyszkolyni ludzie tworzom tu najciekawsze kwiatowe kompozycje. 

Nastympnego dnia po sniodaniu niy moglimy uwierzic w to co my na wlasne uchole uslyszeli - ze dzisiej momy frei colki dziyn i kozdy moze robic co kce, ale tysz my uslyszeli ze momy sie wypocznoc i dobrze nasze szlapki myntolym namazac, bo w sobota zas nos wywiezom , ino ze tym razym jeszcze dalij i w dodatku na colki dziyn ! Ale mimo to kozdy z nos bol uradowany , ze mo  przed sobom tela czasu wolnego , ale ze drugij strony kozdy z nos kombinowol kaj nos tym razym zajs wywiezom ? Czy w jake kamiyniolomy , czy jeszcze co gorszego nos spotko , ale smolic to , na razie momy dzisiej i trza dobrze wykorzystac tyn wolny dziyn , a martwic sie bydymy  jutro ! Czy wy to slyszycie - we sobota mieli my  calodziynne zajyncia w terynie ! My tam wolnego praktycznie niy mieli jakby sie to komu zdowalo, my musieli bardzo napiynty plan szkolynio zaliczyc , wykonac i szlus ! 

A w sobota niy dali nom nawet sniodanio zjejs , ino kozdy musiol sie som cos narychtowac i zapakowac do kabzy abo do rukzaka , bo wyjazd byl punktualnie o godzinie 7.30 !Wlezli my do wynajyntego autobusa , i ledwo co ino kerowca ruszol , pilot nos poinformowol ze som to zajyncia praktyczne ze historie. O M G ! Jeszcze ino tego nom brakowalo zech sie pomyslala  i zaro slysza , ze pojadymy 155 kilometrow w jedna strona , a potym do godziny 15 - tyj bydymy lazic  po ... zlotyj Pradze ! Faktym jest  - ze tam mie jeszcze nigdy niy widzieli !Mysla sie tak po cichu .., ze  tela łajzynio i łobiod zas niy wiadomo o keryj bydzie a moze wcale go dzisiej nie zjymy? Miałach co prowda przigotowane sznity ze sobom , ale jo bez lobiadu - to prawie tak samo jak by mi pychol zaklejyli i faflac zabroniyli !Pilot wycieczki ciekawie i z humorym opowiadol nom podczas  jazdy historia Czech i tych miast bez kere my w danyj chwili przejyzdzali. Rajza do Pragi zleciala nom drapko. Wylezli my na takim wzgorzu zeby potym isc w dol - no to aby tela - sie mysla bo schodow juz mom dojś do konca roku ! Nojduzyj to zeszlo nom zwiydzanie zamku Praskiego ze Katedrom sw. Wita. Mieli my tysz okazjo oboczyc zmiana warty przy rezydyncji prezydynta kero sie miesci na terynie tegoz zamku . A colki zamek loncznie ze otoczeniym  i kaplicami zajmuje bardzo rozlegly  teryn . Zwiedzili my katedra , plac prezydencki i dalej poszli my w strona staryj Pragi . Ale to co my widzieli - to bola ino tako malo czonstka calosci , a nogi juz wszystkim wlajzioly tam skont im zwykle wylajzom. Wreszcie poznym popoledniym dali nom poltora godziny wolnego czasu , by kozdy mog cos zjesc , sie czegos napic , skorzystac z WC - no i  kupic sie  jakos pamiontka ze tyj wycieczki . Po tym juz wspolnie pszeszli my ulicom Paryskom , na keryj mieszczom sie nojdroksze butiki i elegancke sklepy .Jakby ktos z nos chciol sie kupic tam cos nojtonszego , to musiolby  przed tym wygrac wiynkszo suma w totka  - abo zastawic wlasne gacie - inkszyj opcji raczyj niy ma. Dodatkowom atrakcjom gratis bylo oswietlynie zamku i palacu widocznego z daleka , bo w miyndzyczasie jak to bywo o tyj porze roku - zrobiol sie ciemny wieczor ! Ale nojlepszy widok do kozdego z nos w tym momyncie - to bolo ujrzec czekajoncy na nos autobus kery nos tu psziwioz i kery miol nos zawiyz nazod. Czulach zmynczynie , moze nie tela ogolne , co we wszystkich miysniach obu nog , bo jo moga  tyrac pora godzin - ale colki dziyn ? To juz jest totalne przegiyncie, tyla ze tego mom coch oboczyla i czego sie dowiedzialach  to jest moje ! Jak bydziecie miec okazjo to jedzcie do Pragi bo warto jom oboczyc , ale jak pojedziecie  swojim autym to ostowcie sie go pszi piyrszyj stacji metra i dalij jedzcie abo metrym, abo tramwajym ewyntualnie miejskim autobusym.      

No i tak na marginesie chcialach  jeszcze ino dodac ze ludzie sie fest mojich wosof tszepialy stwierdzajonc ze mom je taaaaake fajne - a jaaaake duuuuge ! Czasu na misterne ukodanie kudlow mialach za malo w takij nagonce i nosiolach  je ino spiynte spinkami i zdziepko polokowane , ale jak sie im podobalo to tu na miejscu tyz byda tak czynscij sie pokazywac .

Kaj bylach i cos widziala to mozecie oboczyc sam - jak klikniecie we tyn link

Na som nojpszod to jo sie chca wrocic na chwila do moij lostatnij audycje we tamta niydziela na keryj zech wos poprosila o pozyczanie mi na drap jakij tasie abo kofra no i jeszcze o pomoc przi spakowaniu nojpotrzebniejszych rzeczow - po tym jak zech dowiedziala , doslownie we ostatnim momyncie  ze ostatalach wytypowano na  obowionzkowe szkolynie.Wziynach sie mit zigusiowy kofer na haslo i kosmetyczka od naszyj Urszulki zawiyrano na szyfr. Jak wiycie tyn kofer nojpszod miol bardzo niycynzuralne i niyprzizwoite haslo gosowe , kere musiol odkodowac jedyn znajomy haderlok i zmiynic je na bardzi przizwojite. Te nowe haslo kere podol mi Zigus bylo tak przepiynkne  , co jo sie je mogla gosno godac we kozdych okolicznosciach a nawet we nojbardzij eleganckim towarzystwie a te haslo na slowo to bylo : " Vergis maj nicht " i zodyn sie niy kapnyl lo co mie sie oschodzi. Byli tysz i tacy kerzy mysleli ze to jake dziyn dobry abo smacznego w jakim opcym jynzyku i starali sie grzecznie lodpowiac - nikere godali danke  abo glajch fals abo nawet szyjne tak . Smioc mi sie kcialo jak pieron i ta moja japa sie osjyzdzala jak jaki rajs feszlus ale przeca tsza docynic starania tych  ludziskow - pra ?A  teraz jeszcze roz chca wom ze tego miejsca  ze cokligo mojigo serducha podziynkowac za wasza bezinteresowno pomoc i w podziynkowaniu za to postarom sie wom dzisiej w ciongu audycji zdac relacje w kilku etapach ,  jak to na tym szkolyniu bylo i co tam sie ciekawego dziolo .

Po pszijezdzie na miejsce szkolynio - pozanosiyli my toboly do sfojich z gory przidzielonych nom izbow i na to mieli my 15 minut czasu . co by potym zaro sie zebrac do kupy na placu i po krotkim apelu wygoszonym przez organizatora tego szkolynio wyruszyc w teryn. Piyrszym zadaniym bylo zapoznanie sie ze tom  miyjscowosciom .Tsza prziznac ze miasto mo sporo ciekawych miyjsc kere chcialoby sie dokladnij odwiydzic abo duzij pooglondac !Po dwoch godzinach lajzynio dojs drapkim krokym , kozdy miol dojs i niy kozdymu potym kcialo sie nawet pychol opultac, ale tam niy bylo ze sie niy kce ! Mus to mus i kozdy musiol bez ta dusza przeleciec chocby nawet wody niy lodkrynciol.Wszyscy co do jednego byli my tak padniynci , ze niyftorzi niy zdonzyli ani pogody obejrzec na nastympny dziyn , a byli tyz i tacy kerzy niy trefieli do prykola i padli tam kaj stoli ! 

Drugigo dnia pobudka postawiola nos na rowne szlapy juz o siodmyj , ale co nikerzy - te co spali na stojonco , byli juz na szlapach zdziebko pryndzyj od tych bardzij wygodniejszych utszestnikow . Zdonzyli sie juz swoje cifer blaty opultnonc i kafyj zrobic , bo we wolnym czasie kozdy mog robic na co miol ino chync . £o losmyj wszyscy wypucowani grzecznie sie  stawiyli na sniodaniu a po nim zaro trza bylo zajs pyndzic na zajyncia. Tym razym byla to trudno szkola pszetfanio. Wykludzili nos do lasa i kozali nom sie o wyznaczonyj godzinie zgosic na parkingu za budynkym miejscowyj strazy pozarnyj . Kozdy miol sfoja mapka i wedlug nij musiol isc. Niy szlo nic pocyganic, bo ze trasy tsza bylo prziniys robione po drodze bildy. Jo jedyn taki bild , kery zrobiol mi przipadkowy przechodziyn wom w miyndzyczasie juz pokozala . Widzieliscie - jak wisza na takich linach , na wysokosci poru metrow nad ziymiom bez zodnego zabezpieczynio ? Tego niy bylo w planach zajync, ale kaj jo mialach uciyc jak mie goniol dzik ? Wisialach tam moze tak ze 10 minut jak do tego dzika psziszla locha , cos mu tam do uchola pochrumkala i loba sie poszli w ta gynsciejszo strona lasu . Po drodze tysz musialach byc osobiscie obecno - we Altanie Milosci i koniecznie z nij zrobic bildy na sztyry strony okolicy , kero ze tyj Altanki bola jak na wyciongniyncie rynki.Wszyscy my dotarli na czas w umowionym miyjscu  i wreszcie mogli my isc na upragniony lobiot bo kozdymu z nos kiszki inkszego marsza grali. Po mitaku  kozdy miol wolny czas dlo siebie. A co jo zech robiola w przidzielonym mi  wolnym czasie , to wom opowiym po krotkij przerwie .

Jo we wolnym czasie wybrala sie szpacyrkym do tutejszego Muzem Zabawek. Jest to priwatne muzeum kere powstalo we 2002 roku , a w nim  znajduje sie ponad 3 tysionce egzymplarzy roznych zabawek ze 19 i 20 wieku ze roznych zakontkow swiata.Podziwialach tam  tyjatrzyki i lalki kere w nich wystympowaly , cudowne szopki bozonarodzyniowe, przerozne klocki , zabawki mechaniczne, blaszane , drewniane i szmaciane. Ale jak oboczolach tam oryginalny  elemyntarz - taki jak jo mialach w piyrszyj klasie , to pychol ze radosci ozjechol mi sie automatycznie dookola gowy . To bol gynau taki som ze jakigo jo zaczynala poznowac litery i uczyc sie alfabetu a potym  uczolach sie czytac ! Cieplo zrobiolo mi sie wele serducha jak poczytach w nim , ze to jest Ala , a to jest od nij As . W tym muzeum szlo drap zapomniec o colkym  swiecie, o tym ze czas przemijo  i przeniys sie wspomniyniami  do tamtych bezstroskich dziecych lot . Jak ino bydziecie miec okazjo byc w tyj miejscowosci to bardzo wos namawiom cobyscie wstompiyli koniecznie do tego muzeum , a te szejs zlotkow wydane na bilet wstympu to jest prawie za darmo  za  mozliwosc przeniesiynio sie  do cudownych lot naszego dziecinstwa.

Jo sie tak po cichu myslala, ze po tyj trudnyj lekcji przezycio i przigodzie ze dzikym nic gorszego nos spotkac juz niy  moze , ale zech byla w blyndzie .Wywiyzli nos nastympnego dnia ze samego rana zaroski po sniodaniu - dobrze ze choc dali nom pojejs - do Adrszpach w Czechach. Jest to tak zwane Skalne Miasto kere na poczontku XIX wieku przezolo bardzo srogi pozar kery tam trwol bez pora tydni i zniszczol colko okoliczno roslinnosc i tym samym te skalne labirynty staly sie bardzij przejrzyste i dostympne no i wtedy wlasciciele tych obszarow zaczli tam budowac  piyrsze  sieci szlakow turystycznych .Przed wejsciym kozdy z nos musiol wykupic sie bilet wstympu za 80 koron czeskich w zamian za to  kozdy z uczestnikow dostol malo mapka, a przemilo frelka we lokynku zyczyla nom udanego i milego dnia ! Wiedziala szcziga o czym godo ! Niy godom, ze bylo zle , bo szlak byl dobrze oznaczony , ino  nikere podejscia byly trocha bardzij take mynczonce , a szczegolnie blank sporo ilosc schodow , ale  kozdy kery  zaczon to i skonczyc musiol ta  3.5 kilometrowo trasa . Pogoda nom dopisala jak na listopad - bylo cieplo , a slonce cudownie  rozjasnialo szczyty licznych skal. Mie sie pychol osjasniol jak czytalach nikere nazwy tych skal. Dlo przikladu podom pora - dzban , gowa cukru, gromowy kamiyn, kochankowie , zomb , starosta i staroscino.